張國榮（1956年9月12號—2003年4月1號），原名張發宗，祖籍廣東，生於香港，英文名 Leslie，係一位喺華人社會有影響力嘅香港男歌手、演員同埋詞曲創作者。

佢又叫做哥哥，源自同佢合演《倩女幽魂》嘅王祖賢對佢嘅稱呼。

佢喺1984年至1989年間同譚詠麟並稱香港兩大男歌手，成為香港樂壇巨星。喺1988至1989年度《十大勁歌金曲頒獎典禮》連續兩屆攞「最受歡迎男歌星」。

早喺1982年加入無綫電視嗰陣，張國榮就加入咗華星娛樂有限公司（唱片合約）。1983年，佢推出唱片風繼續吹，裡面同唱片同名嘅廣東話主打歌，為張國榮打響頭炮。而真正令佢走紅嘅，係1984年佢主演無綫劇集《儂本多情》。劇裡面佢飾演一個花花公子，呢種形象令到觀眾覺得好深刻。同年佢亦憑《Monica》一曲首奪十大中文金曲同埋TVB十大勁歌金曲嘅金曲獎，瞬間變為天王級歌手。無綫有啲重頭劇嘅主題曲係曲張國榮主唱，例如1985年《楊家將》。

1980年代，香港樂壇原本係由譚詠麟玩晒，但張國榮走紅，開始挑戰到譚詠麟嘅地位。1987年，張國榮憑一曲《有誰共鳴》壓倒譚詠麟，第一次奪得無綫十大勁歌金曲金獎（1986年度）；同年轉投新藝寶唱片有限公司，大碟《Summer of Romance 87》銷量超過六白金，成為當年 IFPI 香港唱片銷量冠軍。碟裡面嘅《無心睡眠》更加係香港樂壇經典快歌之一。

1980至90年代，張國榮喺影壇同樣取得輝煌成就，1986年佢同周潤發合作嘅《英雄本色》勁收，仲第一次攞香港電影金像獎最佳男主角提名；1987年《倩女幽魂》》首度獲得臺灣金馬獎最佳男主角提名。

喺1988至1989年度《十大勁歌金曲頒獎典禮》，張國榮連續兩屆奪得「最受歡迎男歌星」獎[2]。但佢係呢個時候卻突然宣佈退出歌壇，並喺香港紅磡體育館舉行33場告別演唱會，進行封咪儀式。張國榮自己話「封咪」係因為自己偶像山口百惠退隱，但多數人都認為咁只係導火線，真正原因仲惹嚟猜測。

退出樂壇之後張國榮專心攻影壇。1991年，張國榮因主演《阿飛正傳》，獲得第十屆香港金像獎最佳男主角，成為「香港金像獎影帝」。1993年，張國榮主演嘅電影《霸王別姬》攞法國康城影展嘅金棕櫚獎、國際影評人聯盟大獎費比西獎同埋美國金球獎嘅最佳外語片獎，並獲得美國奧斯卡最佳外語片提名。同年，張國榮亦因此片獲日本影評人協會頒發最佳男主角獎，以及第四屆中國電影表演藝術學會獎特別貢獻獎。1994年，張國榮因主演《東邪西毒》，獲香港電影評論學會大獎－最佳男演員獎[3]。

張國榮亦曾被邀擔任日本東京國際電影節青年導演獎（1993年）及德國柏林國際影展（1998年）嘅評委，係公認最傑出嘅華人影星之一。

張國榮影壇生涯主要演文藝片，但商業片佢都拍唔少。好似《家有囍事》、《金玉滿堂》、《大三元》呢啲張國榮係以搞笑形象演出。其中《家有囍事》收四千九百萬港紙票房，係張國榮從影以嚟最收得嘅。

1995年，張國榮推出唱片《寵愛》後正式宣佈復出樂壇。此後陸續推出多張唱片，皆取得銷售量佳績，攞業界好評。

張國榮幾受日、韓觀眾喜愛，1996年年獲日本《ASIA POP》雜誌讀者票選為《人氣最旺》、《最佳藝人》大獎。

1996年12月，張國榮喺香港紅磡體育館舉行「跨越97演唱會」24場，世界巡迴31場。

2000年初，張國榮喺1999年度《十大中文金曲頒獎典禮》攞「香港樂壇最高榮譽大獎——金針獎」。其後舉行「熱情演唱會」，全球巡迴43場，受到樂迷嘅熱烈歡迎。

喺2000年到2001年這兩年內，張國榮幾乎拿遍中國藝壇嘅所有最高獎項，包括「最流行歌手」、「最傑出藝人」等「當紅」大獎

2003年4月1日，張國榮喺香港文華東方酒店（Mandarin Oriental）跳樓自殺。喺遺書中佢講「Depression.多謝各位朋友，多謝麥列菲菲教授。這一年嚟很辛苦，唔能再忍受，多謝唐生，多謝家人，多謝肥肥。我一生沒做壞事，為何這樣？」。佢喺遺書中感謝各位朋友、唐鶴德先生以及佢嘅精神科醫生。其經紀人陳淑芬女士其後證實佢患上抑鬱症，努力治療年幾，但仍因病情失控而自殺。